[center]لأنك بالتزامك (مؤمن) أهلك
أخاف أشيل دمي مو .. من .. أهلك
منو أبگدي يحبك مو من أهلك
منو أبگدي يحبك من عشرتك
وتمنه يصير إصبع من عشرتك
وأنا أشگظيت خايب من عشرتك
اعد بسنين عشرتنه وهي جروح
وأحس ويه النفس يطلع وهج
وأخيرا گتلي ودعني وهج روح
أروحن وين مااگدر هوى ... انته
وأنا الماهان من أجلك هونته
إلي بدنياي شي واحد هو ... انته
وحرت بين إن تركته وان تبعته
أنا الونيت وألون ... ون ... تبعته
ماباعك حبيبك وانته ... بعته
حبيبك باع عمره ... واشترك بيه
وحزن گلبه أعله حزنك ... واشترك بيه
بعد شدوس گلبي .. واشترگ بيه؟
جبل حبه وتگلگل من تگل بيه
ويدنيه أشما دفعتي لن .. تگلبي
وإذا تنساه يگلبي لنته ... گلبي !
ولا أريدگ بعد وبصدري ... أحملك
وحبيبي اشلون ترضه بصدري .. احم .. لك
إذا حملك يتعبك ... صدري أحملك
إلي وروحي الأرض واشگد دولها
وتداوي الداء لو.. بالمخ .. دوى إلهه
بس العين مايحصل دوى إلهه
دواها العين خلهه من تقر بيه
وتصب كلما تشوفك منته .. قربي
ولك شيصير حبك من ... تقر ... بيه
وتحبني انته يقين بصدري موشك
ألف شوكت سكوت أبصدري موشك
أنذبح گلبي وتشضه أبصد ... رموشك
وعرف محد يدفنه وشي دفن شي
وعگب صدره المواجب شي دفن شي
كفر من رسم غيرك شي دفن شي
وأظن للجنه يدخل من يرسمك
وحبيبك ينسه حزنه من يري سمك
أبسمك حبي جمالك من ... يرسمك؟
وانأ الليل أبعيونك شفته ... كحله !!
وشفت شمس الأصيل وشفتك .... أحله
العسل من ذكته كللك ... شفتك أحله
إذن لو من شفاهك ... بستك اشفه
إذا انته المات ... يعدل بس .. تكشفه
اشتظن حبك يضعفك بس .. تكشفه؟
وعلي تخفي اهتمامك واكتراثك
وانأ المن مات گلبي واگتراثك
نسيت الحب الأول وگ تراثك؟
صدك ينسه تراثه هسه جيلك؟
وتشوف أزواج عيني هسه جيلك
وأنادي وما تگلي هسه أجيلك؟؟
صحت لا ... وصارت لائي .. كبريائي
وإذا راءيت بالشر... كُب .. ريائي
حبيبي اشلون تجرح .... كبريائي
وتذلني أگبال كل ناسك وناسي
وبقيت ابصحره شاتلني وناسي
ناس اتگول لاتسكت .... وناسي
لان كلش مذلتي ........... لاكتلهم
وجبل حبي المقدس .. لا ... كتلهم
كالو حيل ذلك ... لا .... كتلهم
عنايه احتاج گلبه وجاي أعاني
وخفيت اشكثر منك ... جاي أعاني
تمر مرني من أزورك .. جايع آني!!
اشكثر ندمان جيه بيتك عتبته
وعرفني الباب من دگتي ... وعتبته
عتاب وياك جيه أحبه عتبته
گلبي اشلون يمهم وك كسرته
أسير وذل شجالك وك كسرته
گبل جانت أسرتك وك أسرته
أسرتك هسه سوتني ضحيه.
للشاعر نائل المظفر
[/center]